Ipinanukalang Ordinansa Laban sa Maiingay na Modified Muffler, Tinalakay sa Pampublikong Pagdinig 

Idinaos noong ika-04 ng Pebrero 2026, ganap na ika-2:00 ng hapon, sa Municipal Conference Hall, Brgy. Kanluran, Calauan, Laguna ang pampublikong pagdinig kaugnay ng ipinanukalang ordinansa na naglalayong i-regulate ang paggamit ng modified muffler o exhaust pipe at iba pang kahalintulad na aparato sa lahat ng uri ng sasakyang de-motor sa bayan ng Calauan.

Ang nasabing panukalang ordinansa ay naglalayong tugunan ang suliranin sa labis, maingay, at hindi makatwirang tunog na nagmumula sa ilang sasakyan, na nagdudulot ng abala at istorbo sa mga residente. Layunin din nitong mapanatili ang kaayusan, kapayapaan, at kaligtasan sa komunidad sa pamamagitan ng pagtatakda ng malinaw na regulasyon at kaukulang parusa sa mga lalabag.

Pinangunahan ang pagtalakay ng Committee on Transportation ng Sangguniang Bayan, na nagsilbing sponsor ng panukala. Sa isinagawang pagdinig, nabigyan ng pagkakataon ang iba’t ibang sektor—kabilang ang mga motorista, residente, at kinatawan ng kinauukulang tanggapan—na magpahayag ng kanilang opinyon, mungkahi, at suporta hinggil sa panukala.

Ayon sa mga dumalo, mahalagang magkaroon ng balanseng polisiya na magbibigay-proteksyon sa kapakanan ng nakararami habang isinasaalang-alang din ang responsableng paggamit ng sasakyan ng mga motorista.

Ang Sangguniang Bayan ay patuloy na nagsusulong ng mga hakbang upang mapanatili ang kaayusan at disiplina sa kalsada, at hinihikayat ang publiko na makibahagi sa mga ganitong talakayan bilang bahagi ng participatory at transparent na pamamahala.